७६ जनाको ज्यान जाने ‘जेन-जी आन्दोलन’: घाइतेको उपचारमा सरकारको खर्च एक अर्ब नाघ्ने अनुमान

७६ जनाको ज्यान जाने ‘जेन-जी आन्दोलन’: घाइतेको उपचारमा सरकारको खर्च एक अर्ब नाघ्ने अनुमान
२५ सयभन्दा बढी घाइते, अझै १३ जनाको उपचार जारी — अस्पतालहरूबाट अन्तिम खर्च विवरण आउन बाँकी

काठमाडौँ — २३ भदौमा भएको जेन-जी आन्दोलन र त्यसको भोलिपल्ट भएको प्रदर्शनका क्रममा ७६ जनाले ज्यान गुमाए भने २५ सय ७१ जना घाइते भएका छन्। तीमध्ये अहिले पनि देशभरका विभिन्न अस्पतालमा १३ जना उपचाररत छन्।

स्वास्थ्य तथा जनसंख्या मन्त्रालयका अनुसार घाइतेमध्ये ११ जना काठमाडौंका अस्पतालहरूमा उपचाररत छन्। आन्दोलनका क्रममा मृत्यु हुनेमध्ये ५३ जनाका परिवारलाई सरकारले प्रतिव्यक्ति १५ लाखका दरले राहत वितरण गरिसकेको छ। यसअनुसार ७ करोड ९५ लाख रुपैयाँ पीडित परिवारलाई वितरण भइसकेको छ।

त्यसैगरी घाइतेहरूको तत्काल उपचारमा समस्या नहोस् भनेर सरकारले प्रत्येक घाइतेलाई २० हजारका दरले सहयोग रकम प्रदान गरेको थियो। मन्त्रालयका अनुसार उपचारका क्रममा आएका २५ सय ७१ जना घाइतेहरूको भैपरी खर्चका लागि साढे ४८ लाख रुपैयाँ वितरण भइसकेको छ।

मन्त्रालयका प्रवक्ता प्रकाश बुढाथोकीका अनुसार घाइतेहरूको उपचारमा कुल खर्च एक अर्ब रुपैयाँभन्दा बढी हुने अनुमान गरिएको छ। तर, उपचार जारी रहेकाले अस्पतालहरूले अन्तिम बिल पठाउन बाँकी छ। बुढाथोकीले भने, “सबैभन्दा बढी घाइते उपचार भएका ठूला अस्पतालहरूमा अहिले पनि केही बिरामी उपचारमै छन्, त्यसैले एकमुष्ट खर्च विवरण आउन बाँकी छ।”

उनका अनुसार केही डिस्चार्ज भइसकेका घाइतेहरू पनि थप उपचारका लागि पुनः अस्पताल भर्ना भइरहेकाले अन्तिम खर्च विवरण टुंगिन समय लाग्नेछ। मन्त्रालयले गम्भीर घाइतेहरूको दीर्घ उपचारका लागि छुट्टै क्लिनिक सञ्चालन गर्ने तयारीसमेत गरेको छ।