इस्रायल र हमासबीच युद्धविराम सम्झौता, बन्धकहरू ७२ घण्टाभित्र मुक्त हुने

कायरो/यरुशलम, असोज १९।
इजिप्टमा भएको केही दिनको अप्रत्यक्ष वार्तापछि इस्रायल र हमासबीच युद्धविराम सम्झौता भएको छ। अमेरिकी पूर्वराष्ट्रपति डोनाल्ड ट्रम्पको पहलमा भएको यो सम्झौता कतार, इजिप्ट र टर्कीको मध्यस्थतामा सम्पन्न भएको हो।

ट्रम्पले आफ्नो ट्रुथ सोसल अकाउन्टमार्फत युद्धविरामको घोषणा गर्दै यस दिनलाई “विशेष दिन” भनेका छन्। उनले इस्रायली प्रधानमन्त्री बेन्जामिन नेतन्याहूसँग फोनमार्फत बधाइ साटेका छन्।

सम्झौता अनुसार, हमासले शनिबारदेखि बन्धकहरू छाड्न सुरु गर्नेछ र ७२ घण्टाभित्र सबै बन्धकहरू फिर्ता गर्नुपर्नेछ। अक्टोबर ७, २०२३ मा अपहरण गरिएका २५१ मध्ये ४८ जना अझै हमासको नियन्त्रणमा छन्, जसमा करिब २० जना जीवित रहेको अनुमान गरिएको छ।

बन्धक फिर्ता भएपछि इस्रायलले २५० आजीवन कैदी र १,७०० प्यालेस्टिनी बन्दीहरूलाई रिहा गर्नेछ। यस्तै, मानवीय सहायता तुरुन्तै गाजामा पठाइनेछ र सहायता वितरण संयुक्त राष्ट्रसंघमार्फत हुनेछ।

ट्रम्पको २० बुँदे प्रस्तावमा गाजालाई आतंकमुक्त बनाउने, पुनर्निर्माण र आर्थिक विकासका लागि ‘बोर्ड अफ पिस’ नामक अन्तर्राष्ट्रिय निकाय गठन गर्ने व्यवस्था छ, जसको नेतृत्व ट्रम्प स्वयंले गर्नेछन्।

गाजाको अस्थायी शासन प्राविधिक प्यालेस्टिनी समितिले गर्नेछ। इस्रायली सेना चरणबद्ध रूपमा फिर्ता हुनेछ र गाजाको सुरक्षाका लागि अन्तर्राष्ट्रिय स्थायित्व बल (ISF) स्थापना गरिनेछ।

ट्रम्पको प्रस्ताव अनुसार, हमास र अन्य समूह शासनमा सहभागी हुन नपाउने र गाजाको निरस्त्रीकरण प्रक्रिया सुरु हुनेछ। सम्झौता ढिलो भए पनि सहायता र पुनर्निर्माण अघि बढाइने बताइएको छ।