इलाममा मात्र ५७ करोड ५० लाख बराबरको सडक र पुलमा क्षति

इलाम, असोज १९।
अविरल वर्षाका कारण इलाममा मात्रै करिब ५७ करोड ५० लाख रुपैयाँ बराबरको सडक र पुल संरचना क्षतिग्रस्त भएका छन्। कोशी प्रदेश सरकारको भौतिक पूर्वाधार विकास मन्त्रालयले सार्वजनिक गरेको प्रारम्भिक विवरण अनुसार, इलामका विभिन्न सडक र पुल बगाउँदा ठूलो आर्थिक नोक्सानी भएको हो।

भौतिक पूर्वाधार विकास मन्त्री भूपेन्द्र राईका अनुसार, इलाम अन्तर्गतका सडकमा मात्रै १९ करोड रुपैयाँ बराबरको क्षति भएको छ भने सडक र पुल गरी ३८ करोड ५० लाख बराबरको क्षति पुगेको अनुमान गरिएको छ।

यस्तै, जलस्रोत तथा सिँचाइ विकास डिभिजन कार्यालय इलाम अन्तर्गत ३ करोड ७६ लाख रुपैयाँ बराबरको खानेपानी र सिँचाइ आयोजनाहरूमा क्षति पुगेको ऊर्जा, खानेपानी तथा सिँचाइ मन्त्रालयले जनाएको छ।

मन्त्रालयका अनुसार बाढी र पहिरोका कारण इलामका दर्जनौं सडक अवरुद्ध भएका छन् भने धेरै पुल र झोलुङ्गे पुल पूर्ण रूपमा क्षतिग्रस्त बनेका छन्। सरकारले तत्काल राहत र मर्मतका लागि आवश्यक बजेट उपलब्ध गराउने निर्णय गरेको छ।

विपद् व्यवस्थापन समितिको निर्णयअनुसार इलामका लागि २५ लाख रुपैयाँ तत्काल मर्मत, अस्थायी बसोबास र आकस्मिक राहत कार्यका लागि उपलब्ध गराइने भएको छ।